المسلسل مقتبس من رواية كورية اسمها “أب للإيجار” وبيحكى عن أب أربعينى بيخسر وظيفته بعد انتشار كورونا وبتكون الأم هى العائل للأسرة. وبنته بتشوفه انه عبئ على الاسرة، ووقتها بيحصله موقف يخليه يبدأ مشروع تأجير للأباء واللى بيطلبه الطفل عشان يقوم بدور أب ليه مقابل فلوس.
المسلسل من بطولة أكرم حسنى ونسرين أمين وسماء إبراهيم وفريال يوسف والطفلة لافينيا نادر بجانب مجموعة من ضيوف الشرف خلال الحلقات، والمسلسل من تأليف وائل حمدى ومحمد إسماعيل و إخراج خالد مرعى.
وبالرغم من أن المسلسل كوميدى إلا أنه قدم نظرة مختلفة عن الأبوة و اتكلم عن الموضوع من وجهه نظر الطفل و ناقش إهمال احتياجات الأطفال العاطفية والنفسية فى كل مرة كان بيظهر فيها طفل و بيتكلم عن مشكلة بتواجهه علاقته بوالده.
وتعتبر شخصية هشام “أكرم حسنى” تمثيل لتوابع الإهمال من الأب فى الطفولة واللى وضحت خلال مشاهد المسلسل أنه مقضاش طفولة طبيعية وممتعة. زى أنه كان بيشتغل مع والده فى محل الكشرى لما كان عنده ٩ سنين وميقدرش يقول أنه تعبان، أو لما راح الملاهى وانبهر بالألعاب هناك لأنه “طول عمره نفسه يجربها”.
وقدم المجلس القومى للأمومة والطفولة الشكر والتقدير لصناع المسلسل على الرسالة والمعنى اللى فى المسلسل كمان أشاد بالمسلسل كتير من المختصين بالطب النفسى اللى وضحوا أن المسلسل ناقش جوانب مختلفة من مشاكل الأبناء والأباء محدش ناقشها قبل كده وأنه كمان وصل رسايل عن التربية الإيجابية وأهميتها.
وفي اخر حلقة من المسلسل تحديدا بيشيد بيها الجمهور وبتقدم الرسالة بوضوح وبتتضمن إعادة تعريف للأبوة وتأكيد على أهمية الوقت اللى بيقضي الأب مع أولاده بالنسبة ليهم.
