بعد ١٠ سنين على أول ساوند كلاش، ريد بُل راجعين بنسخة جديدة. السنة دي مش زي أي حفلة متعود عليها الجمهور من النسخ القديمة, وأكيد مختلفة عن الحفلات العادية لشارموفرز أو عفروتو نجوم كلاش السنة دي.
قررت وخططت خلاص علشان تحضر ريد بُل ساوند كلاش ٢٠٢٣ بين شارموفز وعفروتو؟ لو الإجابة أيوة، هتعيش تجربة مش هتتنسي. لكن قبل ما تروح، لازم تتعرف على أنواع شخصيات في الأغلب هتقابلهم في الحفلة:
١. ويكليكيس
الباند يطلع من هنا وهوب الموبايل يطلع ومينزلش الا لما الحفلة تخلص. وده معناه انك غالبًا مش هتشوف حاجة فحاول تهرب منهم. وكل ده ليه؟ علشان الخمسة ستة اللي عندهم علي إنستجرام أو سناب شات يعيشوا معاهم اللحظة.
٢. المجاذيب
اللي حافظين كل حرف في كل اغنية، أكتر من عفروتو وشارموفرز نفسهم، حرفياً. ده الأغاني اللي محدش سمع عنها برضة عارفنها ومش بيبطلوا تسميع الحفلة كلها.
٣. العمالقة
مهما روحت و جيت، أو وقفت فين ولّا حتى غيرت مكانك كام مرة، هتلاقي أطول عشرة في مصر واقفين قدامك.
٤. اللي مفكرين نفسهم عارفين كل حاجة
هيقولك انا مفيش اغنية مش حافظها ولما تيجي تركز في اللي بيقوله تلاقيه بيهرتل كلام عمره ما اتقال قبل كده. حاجة كده زي فري ستايل.
٥. الرايقين
دول بقى راميين هموم الدنيا و جايين ينبسطوا و بس. صوتهم اعلى من السماعات و ضحكتهم واصلة لودانهم. دول عايشين احلى لحظات حياتهم، خليك زيهم.
٦. الجاهزين
دول هتلاقي في شنطتهم كل حاجة من الإبرة للصاروخ، شواحن هلاقي، علاج هتلاقي، ماية وأكل هتلاقي. جاهزين لأي موقف وطلب مهما كان مستحيل.
٧. النقاد
دول هتلاقيهم واقفين طول الحفلة بيحللوا الآداء على المسرح ودرجة ألوان الإضاءة.
٨. الأرواح التائهه
دول ولا يعرفوا مين على المسرح ولا ايه المزيكا اللي بتتلعب، بس صحابهم كانوا جايين فـ قرروا يجوا معاهم.
٩. الفنانين
دول تلاقيهم في وسط الحفلة مش بيبطلوا غناء بصوت أعلى من السماعات، وفي الأغلب بيكون صوتهم وحش.
١٠. اللي مش عاجبه
هتلاقي التكشيرة مش مفارقه وشه. ده بقى ربنا معاه، صاحبته وجايباه غصب عنه.
ولو لسه مأخدتش قرار تحضر ولا لا، فتقدر تطلب تذكرت من أبلكيشن طلبات.
